Eze 46 | ZomZIV | STEP | “‘Hih in Thupipen TOPA gen ahi hi: Nisuahna-lam nga tual sungnung kongpi, na kisep ni guk sung kikhak ding hi, ahi zongin Sabbath ni le Kha Thak ni-in kihong ding hi.

Ezekiel 46

1 “‘Hih in Thupipen TOPA gen ahi hi: Nisuahna-lam nga tual sungnung kongpi, na kisep ni guk sung kikhak ding hi, ahi zongin Sabbath ni le Kha Thak ni-in kihong ding hi. 2 Gam-ukpa a pua panin talaap omna kongpi zui-in lut dinga kongpi khuam kiangah a ding diing hi. Siampite in meihal biakna le kilawmtakna biakna ^{▼▼46.2 Tang ngeina-in kilemna biakna tg.12 ah zong} pia ding uh hi. Amah in lutna kongpi panin bia dinga, tua khit ciangin paikhia ding hi; ahi hangin tua kongpi nitak dong kikhak lo ding hi. 3 Sabbath nite le Kha Thak nite in gam mite in kongpi lutna pan TOPA mai ah bia ding uh hi. 4 Gam-ukpa in Sabbath ni-in meihal biakna dingin kawkbaang lo tuuno guk le tuutal khat a pia ding hi. 5 Tuutal tawh piakkhawm ding an-a biakna pen ephah ^{▼▼46.5 Tua in seng 3/5 bang hi kha ding (litre 22 bang)} khat hi dinga tuuno tawh piakkhawm ding an-a biakna pen ama lungkimna zahzah le ephah khat simin sathau hin ^{▼▼46.5 Tua in,quart li bang hikha ding (litre 4 bang)} khat ta pia ding hi. 6 Kha Thak ni simin a vekin kawkbaang lo bawngtalno khat, tuuno guk le tuutal khat hi ding hi. 7 Amah in bawngtal tawh an-a biakna ephah khat pia dinga, tuutal tawh ephah khat mah pia-in, tuuno tawh a piak nop zahzah pia dinga ephah khat simin sathau hin khat ta piakhawm ding hi. 8 Gam-ukpa a sungah a lut ciangin talaap omna kongpi zui-in lut dinga tua lai mah zui-in pusuak ding hi. ^d

9 A kisehsa pawite ah gam mite TOPA mai-ah a pai uh ciangin a bia dinga leilu-lam kongpi a lutte peuhmah leitaw-lam kongpi ah pusuak ding uh hi. Leitaw lam kongpi-a lutte peuhmah leilu-lam kongpi ah pusuak ding uh hi. Ama tumna kongpi ah kuamah pusuak kik lo dinga, ahi hangin ama tum lohna kongpi ah a pusuakkhia ding hi. 10 Gam-ukpa zong amaute lakah a tum leh tumkhawm dinga a pusuah leh pusuakkhawm ding hi. ^e

11 “‘Pawi mawkmawkte le a kisehsa pawite ah bawngtal khat le an-a biakna ephah khat kipiakhawm dinga, tuutal tawh ephah khat mah kipia-in tuuno tawh, a piate in a lungkimna zahzah tawh pia dinga ephah khat simin sathau hin khat ta kipiakhawm ding hi. 12 Gam-ukpa in utthu-a biakna-in TOPA tungah - meihal biakna ahi a, kilawmtakna biaknate ahi zongin a piak ciangin nisuahna-lam nga kongpi amah kihon ding hi. Amah in meihal biakna ahi a, kilawmtakna biaknate ahi zongin a piak ciangin Sabbath ni-a bangin pia ding hi. Tua ciangin amah paikhia dinga, a paikhiat khit ciangin kongpi kikhak ding hi.

13 “‘TOPA tungah meihal biakna dingin nisimin kum khat apha tuuno khatta na pia ding uh a; zingsang simin na pia ding uh hi. 14 Zingsang simin tuate tawh an-a biakna ephah khat sehguk suah seh khat le annel a neelsak dingin sathau hin khat sehthum suah seh khat helkhawmin na pia ding uh hi. Hih TOPA tunga an-a biakna pen ngeina kip hi ding hi. 15 Tua bangin tuuno le an-a biakna le sathaute meihal biakna dingin zingsang simin ahun manin kipia den ding hi. ^f

16 “‘Hih in Thupipen TOPA gen ahi hi: Gam-ukpa in a tapate tungah a gouluahte panin letsong a piak leh ama suante tawh kisai ahi hi. Tua a piak pen amaute luah a neihsa uh suak hi. 17 Ahi zongin a gouluahte sung panin a nasemte khatpeuh a piak leh nasempa in a suahtak kum mateng kem thei dinga; tua khit ciangin gam-ukpa tungah kipia kik ding hi. Ama gouluahte a tapate bek tawh kisai hi; tuate amau aa ahi hi. 18 Gam-ukpa in gam mite hawlkhia-in a van uh ahi a, a leitang uh ahi zongin a goutanh uh a laksak peuhmah kei ding hi. Ka mite khatbeek amau neihsa tawh a kikhenkhiat loh nadingin amaute tate tungah piaksak ding hi, ci hi,’ ci-in gen in,” hong ci hi. ^g

19 Tua ciangin mipa in siampite tawh kisai leilu-lam nga inndei siangthote lampanga tumna kong zui-in kei hong paipih a nitumna-lam monga om mun khat hong lak hi. 20 Amah in kei kiangah, “Hih munah siampite in khialhna hanga biakna le mawhna hanga biaknate huanin, an-a biaknate em ding uh a, a puanung tualah paipih loin mipite apna-in a nei kei ding uh hi,” hong ci hi. ^h

21 Tua ciangin a tual puanung ah kei hong paipih a, akiu li tengah hong paipih kawikawi in, a kiu simah tual khat ciat ka mu hi. 22 A tual puanung kiu li-a tual neute a sung ^{▼▼46.22 Hebrew in hih kammal kician lo hi.} ah om a, adung tong sawmli hi-in avai tong sawmthum ahi hi; akiu li-a om tual neute kikim ciat hi. 23 Tua tualneu lite kimkotah a sangtuamin suang kicianga, tua a sangtuamte nuai-ah mei cih nading thuk kibawl hi. 24 Amah in kei kiangah, “Hihte pen biakinnpi-a Pasian nasemte in mite biaknate a huan nading uh anhuan bukte ahi hi,” hong ci hi. ^j